I boka «Odelsskam» skildrar odelsjenta Maria Lavik oppveksten på eit småbruk på Vestlandet. Ho veks opp med sauesanking, store avstandar, bokbuss annankvar torsdag og historier om ei livskraftig og motkulturell slekt. Men alt som sekstenåring flyttar ho ut. Burde ho koma tilbake?

«Odelsskam» skildrar ein gard, ein plass og ein tilstand som held på å gleppa mellom hendene på forfattaren. Boka skildrar den evige reisa som mange utflyttarar er på, i stadig rørsle mellom bygda og byen, mellom «heim» og heim.

Samanvoven med hennar historie er den særnorske, over tusen år gamle odelsretten. Lova som koplar jorda og slekta saman til ein nesten heilag symbiose. «Odelsskam» er ei nær og rørande historie om tradisjonar og endring.

Viksdalen bygdekvinnelag, Rom for ord og Sunnfjord utvikling inviterer til kveldssete i bygdetunet med mat og prat kring å halde fast eller gje slepp på odelsjorda. Å møtast og snakkast kan gjere det lettare å finne gode løysingar både for seg sjølve, for grenda og fellesskapen. Astrid Marie Vie innleier om Sunnfjord utvikling si satsing på slike møteplassar i grendene. Janne Karin Støylen leier ein samtale med Maria Lavik og fleire om odelsretten og plikta som tvangstrøye eller kjelde til skaparkraft og arbeidsglede.