Høgskulen på Vestlandet, Universitetet i Bergen, Sunnfjord kommune, Sunnfjord Utvikling AS og Helse Førde har teke initiativ til ei helseklynge i Sogn og Fjordane. Intiativet har fått stor oppslutnad og ein går no i gong med eit treåring oppstartsprosjekt for å etablere, utvikle og posisjonere klynga lokalt, regionalt og nasjonalt. Vi ser etter ein engasjert klyngeleiar som kan sikre suksess i satsinga.
Har du lyst til å bygge opp ei ny satsing for å styrke helseinnovasjon i regionen så er dette kanskje den mest spennande jobben på Vestlandet akkurat no!
Klyngearbeidet skal leggje til rette for auka verdiskaping ved å samle kreftene om utviklinga av nye, kunnskapsbaserte tenester og produkt som møter utfordringane i helsesektoren. Dette skjer gjennom tett samarbeid mellom utdanningsmiljø, helsesektoren, næringslivet og interesseorganisasjonar, med utgangspunkt i region Sogn og Fjordane.
Klynga skal skape gode møteplassar, sikre tilgang til relevant kompetanse og testfasilitetar, og bidra til sterkare samhandling på tvers av sektorar. I tillegg skal ho styrkje attraktiviteten og rekrutteringa til regionen ved å synleggjere breidda og omfanget av forskings- og innovasjonsprosjekt.
Klyngeleiar
Til den nye helseklynga søkjer vi ein driftig klyngeleiar. Nettverksbygging og relasjonsarbeid vil vere ein sentral del av arbeidet. Det er ønskeleg med ein klyngeleiar som er «tre-språkleg» med erfaring frå næringsliv, offentleg sektor og/eller akademia. Dette for å sikre relevante aktivitetar, eit dynamisk samarbeid og likeverd mellom partane i klynga.
I den treårige prosjektfasen vert Sunnfjord Utvikling arbeidsgjevar, men klyngeleiaren skal i sitt arbeid representere alle partnarane i helseklynga. Den som vert tilsett skal rapportere til styringsgruppa for helseklynga.
Arbeidsoppgåver
· Etablere og utvikle klynga, samt å finne strategiske samarbeidsrelasjonar lokalt, regionalt og nasjonalt
· Arrangere seminar, konferansar og temasamlingar som bidreg til tettare samarbeid mellom partnarane i klynga
· Fasilitere nettverkssamlingar og legge til rette for oppstart av nye prosjekt mellom partnarar
· Nettverk og relasjonsbygging gjennom å identifisere synergiar mellom tilsette hos partnarane, studentar og brukarar
· Etablere, tilby og vidareutvikle ulike tenestepakkar til partnarane i klynga
· Arbeide med å sikre finansiering til aktivitet og vidare drift
· Bidra til å lette samarbeidet mellom privat-offentleg næringsliv mellom anna gjennom å finne relevante miljø for test og pilotering av produkt og tenester
Kvalifikasjonar
· Høgare utdanning
· Erfaring frå leiing og prosjektarbeid
· Kunnskap om forsking, innovasjon og/eller forretningsutvikling
· Erfaring med å utvikle og skrive søknadar
· Erfaring med formidlingsarbeid gjerne med kunnskap om merkevarebygging og bruk av SOME
Eigenskapar
· Sterk relasjons- og brubyggjar
· God på å skape engasjement og aktivitet
· Driftig, resultatorientert og strukturert
Vi kan tilby
· Spennande og variert arbeid med moglegheiter til å påverke eigen arbeidsdag
· Mogelegheit for å prege utviklinga av ei viktig satsing i Sogn og Fjordane
· Kontorstad i arbeidsfellesskapet med forskings- og innovasjonsmiljøa i Helse Førde og Høgskulen på Vestlandet
· Løn etter avtale og gode pensjonsvilkår
Klyngeleiar vert i første omgang tilsett i eit treårig engasjement med moglegheit for forlenging ved overgang frå prosjektfase til ordinær drift. Prosjektfasen er finansiert med støtte frå mellom anna Sparebankstiftinga Sogn og Fjordane og Vestland fylkeskommune. Ein god del reiseaktivitet må påreknast. Snarleg tilsetting.
Spørsmål om stillingen kan rettast til Gunhild Berge Stang – mobil 976 53 785
Søknad og CV sendes til: gunhild.berge.stang@sunnfjord.no
Søknadsfrist 21. mars.
